Abstract

Chi chi s’occupa da l’archiv cha Margarita Gangale-Uffer ho ordino e surdo a l’ASL dal 2003 nun elavura be ün unic relasch, dimpersè trais, oramai cha sun cò inclus eir ils relaschs dal filolog Giuseppe Gangale e quel dal bap da l’autura, Giatgen Mitgel Uffer. Ma quista es be üna da las particulariteds da l’archiv Gangale-Uffer (chi’d es pel mumaint pür parzielmaing inventariso). La lavur da classificaziun dumanda eir üna tscherta flexibilted linguistica, cun que cha’s passa da manuscrits e dactiloscrits da differents idioms rumauntschs a texts scrits per tu das-ch standard u tudas-ch svizzer fin ad oters in danais, taliaun u dafatta arbresh (albanais da la
Calabria). L’archiv nun es però be da granda varieted linguistica, ma eir d’üna richezza da geners litterars.
Uschè nun es que evitabel da’s perder lavurand cò e lo in raquints pel radio, poesias, correspundenzas, texts filologics, differentas traducziuns ed oter pü.

L’ouvra pü voluminusa da Margarita Gangale-Uffer es la biografia sur dal professer Giuseppe Gangale, Ein Leben im Dienste der Minderheiten (1986), cun ün titel chi s’affo eir cun l’autura svess, siand ch’ella ho publicho surtuot per rumauntsch, traunter oter la collecziun da poesias Damaun es sulagl (1988) ed il seguit dialogic Traunter Pizza. Chi chi ho vöglia da sfuiner aint ils documaints d’archiv vain però a scuvrir auncha bgers oters s-chazis praticamaing incuntschaints, eir perche cha la granda part da las lavuors da Margarita Gangale-Uffer sun sparpagliedas in differents periodics e spettan auncha da gnir reunidas in üna cuverta da cudesch.