Disfar la fassada: ideas ed ideals da feminilitad en la litteratura rumantscha contemporana da 1965 fin 1975

Abstract

Quest artitgel less mussar exemplaricamain, co che texts or dal Chalender Ladin, l’Ischi ed il Calender Romontsch han enritgì durant ils onns 60 e 70 las perspectivas femininas e la represchentaziun da las dunnas en la litteratura rumantscha. En il context rural resta numnadamain da considerar, che rollas da schlattaina ston vegnì contempladas a moda magari differenziada, gist perquai che forzas da lavur vegnivan en la champagna istoricamain savens duvradas a moda pli eguala (Conzett 2006: 27). Gist uschia pudess la litteratura populara era sa cumprovar sco champ d’experiment. Per l’analisa è vegnida tschernida la perioda tranter 1965 e 1975, perquai ch’il moviment da dunnas è sa sviluppà durant questa perioda ensemen cun il moviment da giuventetgna dal 68, uschia ch’ins po spetgar durant quest temp ina pli gronda recepziun e resonanza pertutgant la perspectiva feminina. Era cumenza il scriver da las dunnas (auter che per exempel en lingua tudestga) pir da lez temp a chattar dapli attenziun en il Grischun (Ganzoni 2000; Riatsch & Walther 1993). Era qua pudessi pia esser pussibel da documentar in tschert midament.